الحمله الصليبيه الاولى (1095 - 1099) حمله عسكريه اوروبيه ضخمه قادها جودفروى دى بويون Godefroy de Boillon، و بوهيموند الاول Bohemond I، و تانكريد Tancred، و رايموند الرابع Raymond IV. زحفت قوات الحمله على اسيا و استولت على نيقيا 1097، و غلبت السلاجقه فى دوريليوم، و احتلت انطاكيه 1098، و عسقلان 1099 و القدس 1099، و أسست مملكة بيت المقدس اللاتينيه (مملكة أورشليم) تحت حكم جودفروى دى بويون. بدأت الحروب الصليبيه بمباركة بابا الكاتوليك اوربان التانى (Urban II) اللى دشن الحرب بخطبه من جمر قالها قدام الجموع المحتشده يوم التلات 27 نوفمبر سنة 1095، وقت انعقاد مؤتمر كليرمونت Clermont فى فرنسا (18 نوفمبر - 28 نوفمبر 1095)، و اللى بداه بقوله "" يا شعب الفرنجة! شعب الرب المحبوب المختار! "" و بعدين اتكلم عن جنس لعين خرب بلاد المسيحيين و هدم الكنايس و قطع أوصال مملكة اليونان.و قال ان لازم الإنتقام منه عن طريق: "" انتم ياللى حباكم الرب اكتر من أى حد بالمجد فى القتال و الشجاعه الكبيره، و بالقدره على اذلال روس اللى يعترضوا طريقكم "" و بعدين فكرهم بأمجاد شارلمان و عظمته و أمجاد ملوكهم التانيين و قالهم ان قبر المسيح فى بيت المقدس لازم يثير همتهم و يروحوا يحرروه هو و اورشليم من الكفار.